即係咁！小女子向來都有入廚根底嘅，只係平日已經忙，關於食，都係交畀屋企姐姐處理，自己就擔當總指揮一職（即係手指指阻住晒嗰隻），但近日抗疫少咗出街食飯，嗰鋪煮嘢癮係出番嚟嘅，所以上個星期喺廚房掉咗一堆買得好開心，但開都未開嘅過期醬料，重新入貨後又可以「玩嘢」喇！

今日有人話要食燒春雞同意粉！好！你估難到我咩！買咗兩隻春雞，一開二，留起咗半隻，連埋姐姐三件啱啱好，仲整咗個香草大蝦意添！不過，為免阻住個廚房，影響一屋4主子嘅晚餐時間，嗱嗱聲整完散水，食完先記得冇影相！

 

P.S 最後係全清，只剩雞骨，交到功課啦！