曾幾何時，幾位小寶貝會輪流返舖招呼一下佢哋各自嘅fans😂，但近年就鮮有現身，除咗因為幾位食玩瞓幾方面「越嚟越忙」😵，主要因為佢媽媽（即係我）主要將精力放喺後勤上，同樣很少參與前線工作（但仍然係主腦嚟架，無偷懶架）。不過，近日翻看舊照，發現原來幾個寶貝當年都好勤力，成日都跟媽咪返舖頭坐陣，當中以Rice和Congee在店內出現的身影最多，證明佢哋人氣唔錯。

 
另外，數數手指，@DOG喺呢個「咁嘅場」🍎前前後後都搬過三次舖，期間經歷過少少水浸（３寸高嗰種少少）、停電、突然裝修問你打算點………呢啲小事咁啦！係呀，係咪喺字裡行間聞到陣怨氣？係正常嘅，不過有怨啫，並無恨，因為唔值得😎，只係覺得業主們呀，唔出手幫忙唔緊要，你咪閃埋一面當自己無存在囉（雖然交租嗰時會記得你），但唔好再成日推啲員工出嚟做醜人啦，咩努力諗方法同大家共度時艱呢啲對白唔好再講嘞，真係聽親都笑出聲。
 
 

其實@DOG真係好幸運，多年來有好多信任我哋嘅飼主們，對我哋不離不棄🙇🏻‍♀️，令我哋由大無到有，加上為咗🐶🐱毛孩嘅健康，大家無論喺咩壞情況下，都盡最大努力令家中寶貝生活保持不變，這點我多年來都深深體會到的，今次這個疫情，亦令到很多本來沒有接觸網購的飼主，為毛孩改變購物習慣，踏出網購第一步，@DOG亦慶幸早在疫情前已加強了網站系統，令大家購物比以前更加方便。所以，我和寶貝們喺呢度答應大家，@DOG無論喺任何情況下，都會盡最大努力繼續服務大家，將來要變，也只會變得更好💪。